ថ្ងៃមួយនោះ ខ្ញុំបានធ្វើដំណើរតាមផ្លូវកាត់មុខផ្សារអូរឫស្សី ក្រឡេកមើលផ្សារឃើញអក្សរធំៗដែលសរសេរថា «ផ្សារអូឫស្សី» ។ ដល់ទៅមើលទៅម្ខាងទៀតស្រាប់តែឃើញគេសរសេរ «អូរឬស្សី» លែងដឹងថាត្រូវអានយ៉ាងម៉េច ? កាលរៀនបឋមសិក្សាគ្រូអត់បានបង្រៀនឱ្យប្រកប «ឬ» ជាមួយព្យញ្ជនៈផ្សេងសោះ ដល់អញ្ចឹងទៅលែងចេះអាន ។ មិនដឹងថាគាត់សរសេរខុស ឬក៏ខ្ញុំរៀនមិនដល់ ? បើតាមចំណេះដឹងខ្សត់ខ្សោយរបស់ខ្ញុំ នាំឱ្យខ្ញុំអានថា «អូរ ឬ ស្សី» ។ យ៉ាប់អានត្រង់កន្លែង «ស្សី» ហ្នឹង ។ ពេលក្មេងៗសួរពីឈ្មោះហាងហ្នឹង អត់ដឹងថាត្រូវប្រាប់យ៉ាងម៉េចទៀត ព្រោះខ្ញុំអត់ចេះអាន ។
បណ្ណសារ ប្រចាំខែ៖ ខែសីហា 2009
—សូមស្វាគមន៍—
សូមស្វាគមន៍មកកាន់ Blog ថ្មីរបស់ខ្ញុំ ។ អ្នកទាំងអស់គ្នាប្រហែលជាគិតថា ប្ដូរចុះប្ដូរឡើងគួរឱ្យធុញ ។ មូលហេតុពិតដែលខ្ញុំប្ដូរព្រោះ Blog ចាស់របស់ខ្ញុំឈ្មោះពីរោះពេក ន័យទូលាយពេក (ពុទ្ធិសម្រាប់ខ្មែរ) ប៉ុន្តែខ្ញុំគិតថាពុំទាន់អាចដល់ថ្នាក់នោះទេ ទើបខ្ញុំសម្រេចចិត្តប្ដូរមកជា «កំណត់ត្រារបស់សេរីបណ្ឌិត» ព្រោះអ្វីដែលខ្ញុំយកមកប្រកាសប្រាប់សាធារណជន គឺគ្រាន់តែជាកំណត់ត្រារបស់ខ្ញុំតែប៉ុណ្ណោះ ។ ហេតុដូចនេះសូមមេត្តាអភ័យទោសភ័យឱ្យរូបខ្ញុំផង ។ ចំពោះការទាញយកកម្មវិធីនានា (វចនានុក្រមអាន, វចនានុក្រមខ្មែរ…) ខ្ញុំនឹងរៀបចំឡើងវិញនៅលើ Blog ថ្មីរបស់ខ្ញុំ, ប៉ុន្តែសុំម្យ៉ាងកុំរអ៊ូរឿងខ្ញុំប្ដូរ Blog ប្រយ័ត្នចុកពោះ បើមិនអញ្ចឹងទេក៏យប់ឡើងខ្មោចលងដែរ ។
ជូនពរថ្ងៃកំណើត
និពន្ធដោយ ៖ ព្រះតេជព្រះគុណបណ្ឌិត ហេង សុវណ្ណ
ច្រៀងដោយ ៖ ក្រុមតន្ត្រីមរតកស្រុកស្រែ
សូមជូនពុទ្ធពរ ៤ ប្រការ ដោយរាប់អានគ្នាដ៏ស្មោះស្ម័គ្រ
ក្នុងថ្ងៃកំណើតរបស់អ្នក ជួបជុំមិត្តភ័ក្ត្រស្និទ្ធមេត្រី ។
អាយុ វណ្ណៈ សុខៈ ពលៈ សូមមានដល់អ្នករួចទុក្ខភ័យ
ជួបជុំគ្រួសារញាតិប្រុសស្រី បានសុខសួស្ដីតទៅអើយ ។
អត្ថបទទី ១២ នៃ «នមស្ការព្រះរតនត្រ័យ និង កំណាព្យព្រះពុទ្ធសាសនា» ដោយ ព្រះតេជព្រះគុណ ហុក សុវណ្ណ
ពង្រាង ឬ សេចក្ដីព្រាង ?
គ្រូរបស់ខ្ញុំធ្លាប់បានផ្ដល់ដំបូន្មានថា « ជាអ្នកច្បាប់មួយរូបគប្បីប្រើប្រាស់ពាក្យឱ្យប្រយ័ត្ន » ហើយគាត់បានលើកពាក្យមួយមកបង្ហាញគឺ « ពង្រាង » និង « សេចក្ដីព្រាង » ។ គាត់បានប្រាប់ថា « ពង្រាង » ក្លាយមកពីពាក្យថា « រាង » (រាងចាល) ដែលមានន័យថាធ្វើឱ្យរាងចាល ។
បើតាមវចនានុក្រមខ្មែរ ពាក្យ « ពង្រាង » នេះមានថ្នាក់ពាក្យជាកិរយាស័ព្ទ ដែលមានន័យថា ធ្វើឱ្យរាង ដោយផ្ដល់ឧទាហរណ៍ « ជេរវាយពង្រាងវា » ។ ដូចជាពាក្យ រឹង>ពង្រឹង, រាក់>ពង្រាក់, រត់>ពង្រត់, រា>ពង្រា, រាក>ពង្រាក… ។
ការពិត ឬ ការណ៍ពិត ? (ទំនើបកម្មលើកទី ១)
ដោយបានការចោទសួរពីសំណាក់ រដ្ឋ នៅក្នុងប្រកាស «ការពិត ឬ ការណ៍ពិត ?» ហើយថែមទាំងបានការពន្យល់ពីសំណាក់វាគ្មិននៅក្នុងវេទិការអក្សរសាស្ត្រខ្មែរ នៅវិទ្យាស្ថានពុទ្ធសាសនបណ្ឌិត្យ កាលពីថ្ងៃសុក្រ ទី ២១ ខែ សីហា ឆ្នាំ ២០០៩ នេះ រួមទាំងបានការពន្យល់បន្ថែមពីសំណាក់ព្រះសង្ឃមួយអង្គនៅថ្ងៃដដែល ទើបញ៉ាំងឱ្យខ្ញុំដាក់ប្រកាសថ្មីមួយទៀតដោយប្រើចំណងជើងថា «ការពិត ឬ ការណ៍ពិត ? (ទំនើបកម្មលើកទី ១)» ដោយគ្រាន់តែធ្វើការបន្ថែមលើប្រកាសចាស់ ដែលមានការខ្វះខាតប៉ុណ្ណោះ ។
ការពន្យល់អំពីអត្ថន័យរបស់ពាក្យនីមួយៗ ដែលការពន្យល់នេះត្រូវបានដកស្រង់ពីវចនានុក្រមខ្មែរ ៖ Continue reading
កីលាដ្ឋាន ឬ កីឡដ្ឋាន ?
កំពុងតែអផ្សុកក៏បើកវចនានុក្រមមើលពាក្យដើម្បីបំបាត់ភាពអផ្សុក ។ ពេលនោះខ្ញុំក៏បានប្រទះពាក្យមួយទៀតគឺ Continue reading
ការប្រកួតក្បាច់គុនខ្មែរ…
នៅថ្ងៃទី ២៧ ដល់ ថ្ងៃទី ៣១ ខែសីហា ឆ្នាំ ២០០៩ នេះ សហព័ន្ធកីឡា ល្បុក្កតោ កម្ពុជា រួមជាមួយ ក្រសួងអប់រំយុវជន និងកីឡា នឹងរៀបចំការប្រកួត កីឡា ល្បុក្កតោ ជ្រើសរើសជើងឯកទូទាំងប្រទេស ប្រចាំឆ្នាំ ២០០៩ នៅពហុកីឡដ្ឋានជាតិ អូឡាំពិក (ក្នុងវិមានពហុកីឡដ្ឋានជាតិ) ។ ពេលវេលាប្រកួត ៖
- ព្រឹក ម៉ោង ៨.០០ ដល់ ១១.០០
- ល្ងាច ម៉ោង ១៤.០០ ដល់ ១៧.០០
ការប្រកួតរួមមាន ការសម្ដែងទ្វារមេគុន ដៃ ដំបងខ្លី សមយុទ្ធជាលក្ខណៈឯកត្តជន និងជាក្រុម ថែមទាំងមានការប្រយុទ្ធបែបប្រភេទទម្ងន់លើសង្វៀន ។
សូមបងប្អូនជនរួមជាតិអញ្ជើញចូលរួមទស្សនាឱ្យបានកុះករ ដើម្បីជាការលើកទឹកចិត្តដល់កីឡាករ និង ដើម្បីលើកតម្កើងក្បាច់គុនបុរាណខ្មែរ ដែលជាកេរមរតកជាតិយើង ឱ្យមានឈ្មោះល្បីល្បាញឡើងវិញ ។
ចូលរួមទស្សនាដោយសេរី….
ព័ត៌មានលម្អិតទំនាក់ទំនង ៖
០១១ ២២០ ៦៩៩ / ០១៦ ៤៥៤ ៨៦០
០១៥ ៦៦០ ៦៥៦ / ០៨៩ ៦៨៧ ០៨៦
